大市唞完氣，又再上過。早段受泰國政變影響，恒指曾一度下跌逾120點，但好快就由低位回升，午後在中移動（941）同滙控（005）兩大藍籌帶領下，恒指搶到接近最高位收市，大升166點，期指更大升247點，成交亦大增到333億元，咁嘅氣勢，今日再創今年新高可期，年底前恒指可見18000至18700。
恒指逼近今年新高，同9月4日的日中新高只相差16點，同收市更只差1點，當日滙控高位同收市分別係142元及141.90元，噚日收140.80元，相信會繼續發力收復失地。
大摩新鮮熱辣嘅研究報告就睇好滙控，投資評級由「持有」調高至「增持」，目標價亦由150元調升至157元；報告指滙控投資銀行表現強勁，在平穩的利率環境下，資本情況理想，集團的派息比率有望提高。滙控現時全年息率逾4厘。
滙控中期業績比預期為佳，06年上半年，盈利87.29億美元，升15%；每股盈利78美仙，升13%，第二次中期股息15美仙，上半年合共派30美仙，升7%。估計滙控06年全年賺170億美元，每股盈利1.52美元（折11.8港元），預測PE11.9倍。
9成大行睇好
9成大行都看好滙控前景，瑞信最樂觀，目標價168元，睇滙控見150元以上嘅大行除大摩外，仲有麥格理、荷銀、摩根大通、BNP百富勤同中銀等。
好似噚日睇好國壽（2628）就買國壽C輪，睇好滙控，短炒當然亦要買滙控C輪，滙控如果升1元，好和味。
9月8日推介中新集團（563），當時股價0.74元，噚日已上到0.83元，今個升浪，唔單止突破前高位0.80元阻力，而且仲有大成交（4300萬股）支持，中線可重上1.20元水平。
炒落後房產股，中新應係首選，有房產股已創出新高，亦有房產股上到接近高位水平，但中新（以噚日收市價計）同今年高位比較，跌幅仍逾35%，跌得過龍嘅，反彈亦會好急。
郭兆誠