買樓陷阱時有聽聞，但原來租樓一樣有機會招致損失。正如是次投訴人余先生，早前透過中原地產覓得租盤，滿以為有代理「專業」協助，萬事可放心。誰知入伙不足1個月，單位便收到法庭傳票，原來業主拖欠樓按供款，被銀行入稟法院追討，余先生無端捲入漩渦，心煩不已。
託代理查冊仍然出事
余先生對於以真金白銀，付足佣金委託地產代理辦手續，但最終仍然出事，覺得很無奈。「經紀話睇過晒所有嘢冇問題，我先簽租約，我冇經驗，又唔係專業，梗係信佢哋啦，點估到佢哋做嘢咁求其。」
今年7月，余先生透過中原青衣區地產代理鄧小姐和佘先生，洽租區內藍澄灣1座中層H室。他指出，在簽署臨時租約前，曾囑託代理要替他作物業查冊，並代為檢查業主的供款紀錄。
「我記得7月8號嗰日，鄧小姐睇完查冊之後同我講，話可能有些少問題，叫我唔好簽住，但轉過頭，佢上司佘先生就改口話冇嘢，仲話睇埋業主嘅供樓證明，拍晒心口話冇問題。」
余先生不虞有詐，當日與業主簽訂臨時租約，並在7月11日再簽署正式租約，同時支付8月份6500元租金外，還預繳了1個月上期和1個月按金，另給予3250代理佣金。
業主放租前已沒供樓
余先生8月1日搬進新居，但僅住了數星期，單位便收到法庭傳票，他這時才發現，業主已沒有供樓多時，正被美國通用金融入稟法院追討。「我睇到法庭寄嚟嘅文件都好愕然，業主原來自從今年6月之後已經冇供樓，𠵱家銀行告上法庭。」另外，余先生近日又獲悉，屋苑管理公司亦正循小額錢債審裁處，追討單位業主自5月起拖欠的管理費合共4140元。
「點解業主明明冇供樓，佘經紀都話『冇問題』，仲叫我簽約吖，一係佢根本就冇睇過業主嘅供款紀錄，如果唔係，佢哋就係夾埋呃我！」余先生氣憤道。他表示，租住這個單位，原是打算作新婚居所，為了住得舒服，更額外花錢髹漆牆壁及訂做家具，至少花了1萬蚊，萬一執達吏要收樓，他損失不菲。「𠵱家搞成咁，已經唔單止係錢銀問題，亦令我好煩、好困擾，唔知係咪隨時又要搵屋搬。」
本報就事件向中原地產查詢，該公司回覆，在簽訂臨約前，鄧代理有就相關物業進行土地查冊，並根據查冊所得的資料向投訴人余先生作出解釋。投訴人表示明白，並且沒有進一步作出其他查詢或要求。
發言人又指。中原曾聯絡業主，她解釋因早前往外地公幹，故未能依時繳付供款，並說會清繳有關款項。
發言人說，為了解決投訴人的疑慮及維持客戶關係，已向他作出承諾，倘若有關物業被銀行收回，投訴人需要遷出，公司將免費為他尋找另一合適單位。
銀行未收樓仍要交租
另外，黃國桐律師指出，在法律上，銀行一日未收樓，租客仍要履行租約條款，繼續交租。不過，如果業主在將按揭單位出租之前，沒有取得銀行同意，萬一斷供，銀行收回單位的話，則租客的租住權便不會受到保障，而租客繳付的上期、按金，亦有可能無法取回。