煲呔入主禮賓府之後，噚日終於請晒立法會大哥大姐去食飯，反斗精長毛也在賓客之列。長毛雖然深受西方民主思想影響，但同時好識得中國禮節：禮多人不怪，長毛噚日就帶咗隻冇心肝嘅「竹織鴨」去禮賓府，準備送畀煲呔做入伙禮物。點知煲呔嫌份禮物唔好，所以唔畀長毛帶鴨內進，枉費人家一番好意；最終長毛仲要被人抬走，呢種待客之道，應該由曾生教吓青年學生。
其實長毛噚日都算聽話，事關佢入禮賓府前，除咗肯乖乖放低隻鴨，仲肯照工作人員吩咐，喺寫住「人民不會忘記」嘅T恤外笠番件西裝褸（主人家借出嘅）同呔，難怪馬丁都笑，話未見過佢咁靚仔。點知入到去，發現楊森、大嚿同單雞等人都無打呔，覺得煲呔好明顯對佢另眼相看。
作為社運分子，唔通長毛真係甘於求其入去食餐飯就走人咩？點都要讓煲呔聽聽市民心聲㗎，所以喺煲呔講完話「好羨慕自由黨成員做晒公公同婆婆」，恨抱孫恨到出面嘅開場白後，長毛正式發功，大聲叫煲呔唔可以劫富濟貧，又叫「唔要GST，只要最低工資」嘅口號。
愛國愛港力量人丁單薄
佢叫叫吓，就有幾個人嚟阻止佢，之後再加多幾個，夾手夾腳將佢抬走，結束佢短短十幾分鐘禮賓府之旅。長毛無緣喺禮賓府歎港麗到會嘅中式名菜，只好行番落去政府總部個canteen啃平價碟頭飯；但長毛都食得津津有味，食飯嘅嘢，食乜唔重要，同邊個食至重要。
其實長毛唔係第一次被逐，理應無乜感覺，但佢話今次最大感受，係煲呔真係變咗。長毛記得煲呔未做特首之前好似大方啲，至少曾經喺一次論壇上，收過佢送嘅鞋擦；𠵱家水鬼升城隍，除咗小器同燥火咗外，仲要郁啲就擺官威，要人聽教聽話。你估香港係動物園，你係馴獸師咩。長毛話，如果煲呔好似范太咁好聲好氣叫佢食完至講，佢一定畀面。
長毛走咗之後，煲呔同其他議員繼續吃喝。噚日抽籤坐主家席嘅，大部份係民主派，包括高達、阿涂、大嚿、余大狀，仲有奇迹露面嘅劉千石；譚耀宗同何鍾泰忽然成為少數民族，真係風水輪流轉。
原來噚日到場嘅亦係民主派居多，工聯會三子全數無到（煲呔唔知會唔會又嬲喇），民建聯馬力、劉江華、陳鑑林同黃容根都唔喺香港，愛國愛港力量人丁單薄。馬丁仲話當煲呔講到抱孫時，佢問可唔可以既抱孫又普選，煲呔梗係無答啦。八方覺得煲呔下次應該搞個抱孫宴，等各位阿爺阿婆帶晒啲孫出席，睇怕到時都有普選啦啩。