曾憲梓個二仔曾智雄同個姓楊嘅女藝人交往搞到一身蟻。民建聯嘅蔣麗芸就幾幫曾少爺，講咗唔少好話。蔣麗芸話同曾二少好friend，佢唔信呢單嘢，因為知道曾二少好鍾意打波，成日隨傳隨到，而且屋企有細路，根本好忙，好少喺香港，所以應該唔會有婚外情。蔣麗芸話，呢兩日風頭火勢，過多兩日會打個電話畀曾二少。佢好希望兩個大人為咗啲細路着想可以破鏡重圓；但係佢又補飛話，兩個都係大人，就算真係分開亦未必係壞事。
曾二少就好彩，有人撐；另一位二少就慘情，緋聞曝光後唔止冇人幫，仲俾人笑，話佢俾太太困在房中「教訓」，點教訓當然冇人見到，但就更加多聯想，哈你估二少奶有冇家法侍候呢？
蔣麗芸噚日響工商界婦女慶祝國慶酒會做司儀，表現有DoDo姐風範。講開呢個酒會，高官如民政嘅陳甘美華，以及政制嘅謝凌潔貞都畀足面，而佢哋見到唐媽媽尤淑圻時，更加上前擁抱，手牽手雞啄唔斷，唐媽媽受歡迎程度真係唔講得笑嘞。