華華做咁耐財經，都未見過有上市公司做死人生意嘅，但香港遲啲可能有一隻「殯儀股」出現。有隻叫做嘉利盈融資（8029）嘅創業板股仔，噚日出咗個通告，確認正喺內地傾緊收購殯儀業務，但只係喺初步階段，未簽合約。
呢隻嘉利盈嘅股價都幾厲害，今年5月易主，8月底批股集資千零萬，批完股後，股價好似火箭咁升，噚日出咗個通告後，單日升14.3%，收0.52元，累計一個月升咗成5.6倍，市值暴漲至4億幾。
嘉利盈嘅新主人叫做徐秉辰，以前做對沖基金經理，估唔到佢炒股叻之外，原來搞上市公司都有一手，仲開創本港股市先河，整隻「殯儀股」，聽落好似唔多老嚟，啲散戶唔知會唔會覺得有啲棹忌，唔想跟呢！
市場規模200億
華華又聽講，除咗嘉利盈變身「殯儀股」外，有一隻喺內地做緊殯儀業務嘅公司，計劃嚟香港上市，聽講已經進行緊㖭。雖然話死人財有啲大吉利是，但係原來內地呢個市場都幾好搵。中國有十幾億人口，每年生生死死嘅人冇一萬都有幾千。有人話，成個殯儀市場嘅規模大到成200億錢，華華心諗都唔算係好誇張啫！
李華華
[email protected]