筆克遠東（752）上月尾以小雙底（1.36及1.38元）回升，最高見1.72元，之後喺1.57至1.68元之間整固，現價正處三角形整固形態末端，隨時向上爆，要留意。隻股噚日收1.62元，微升1仙。
喺「Uwantsforum」內，網友jolandtha表示有興趣買入呢隻股。free3sky回應：「（股價）升咗好多……前景應該不錯，2008概念又要炒炒」另一網友bugegg認為：「都睇好，不過睇住佢$2.X一路落都有啲失望。」大好友ding001就話：「已經入咗好耐，等緊機會再入多幾手。」
筆克主要從事展覽會及市場項目推廣，業務遍及世界各地，喺經濟全球化推動下，前景看好。集團6月底公布中期業績遜預期，主要係有部份大型項目趕唔切入賬，相信下半年業績會大躍進。集團曾參與多項國際性運動會承建項目，早已在行內奠定地位，08年奧運喺北京舉行，筆克多一個概念可炒。
筆克上月底突破悶局時成交大增，近排整固時成交萎縮，係好現象，一旦向上，首目標1.84元，跌穿1.50元止蝕。