曾憲梓二仔曾智雄嘅老婆吳嘉寶日前刊登分居啓事，仲話因為楊姓女藝人介入而破壞佢嘅18年婚姻，事件震撼娛樂圈，加上曾智雄話佢識得嘅女藝人之中，除咗弟婦黎瑞恩之外，就只得楊采妮，所以近日有唔少揣測性嘅報道。
羅霖翁嘉穗表關注
雖然楊采妮前日已經飛咗去新加坡出席朋友嘅婚禮，不過佢噚日透過經理人公司年代影視傳訊發出聲明，內容大意話楊采妮一直對傳媒採取合作態度，同埋交代佢同曾智雄冇來往。
聲明強調「楊采妮小姐絕對沒有介入任何人之家庭糾紛內，而對於任何人或所有不實而有毀壞楊采妮小姐的聲譽及攻擊性之報道，及對楊采妮小姐構成所有之不便，本公司將交由律師，作出法律上之追討權利。」
曾智雄婚變事件近日成為城中熱話，羅霖同翁嘉穗噚日喺中環ifc出席Geiger時裝店開幕時都話有留意呢單新聞，羅霖話：「我都估緊係邊個呀（楊姓女藝人），不過如果件事發生喺我身上，我就唔會好似曾太咁用呢個方法公開畀外界知，因為始終佢老爺同老公都係社會上知名嘅人。」翁嘉穗就話雖然好難唔留意呢單新聞，但自己係局外人，唔方便評論咁多。
