香港嘅日本餐廳多不勝數，但員工會穿起傳統和服嘅就無乜幾多間，「嵯峨野」開業18年，員工要着和服呢個制度未變過，望落去就夠晒靚，唔知員工又點睇呢？
Mandy剛剛做咗兩個月，佢話：「第一眼見到套和服真係覺得好靚，不過就要用好多時間先着得掂，返工頭幾日，要用45分鐘先可以着好件和服，仲要其他人幫手着㖭！𠵱家好啲喇，可以自己一手一腳搞掂，不過都要用15分鐘先着好。」用15分鐘未算最快，「嵯峨野」助理經理坂東葉子着十幾年和服，着慣着熟10分鐘就搞掂。
睇就夠靚喇，着和服做嘢似乎唔太方便喎，Mandy解釋：「着和服Serve客需要時間去適應，𠵱家無乜問題吖。反而我覺得着住和服做嘢個人會斯文咗，起碼唔可以急急腳咁行，畀客人嘅感覺都Relax啲。仲有呀，條腰帶束得緊，感覺上有啲Keepfit作用，束住個肚腩嘛。」係咪咁神奇可以Keepfit我就唔知，不過一套和服都要成幾千蚊，着住都已經夠開心啦。
記者：黃若茵
攝影：陳偉強
精選雜錦刺身$625
雜錦刺身共7款，師傅每次會揀選不同嘅新鮮魚生，今次就有帶子、拖羅、海膽、等，每款入口極鮮。
（前）松茸茶壺湯$150
松茸天婦羅$250
最新推出松茸料理，茶壺湯用門鱔、蝦、松茸及麵豉湯煲成。天婦羅帶濃烈香菇味，灑上少許綠茶鹽仲好味。
火鍋任食放題每位$550
澳洲和牛、黑豚肉、白身魚及雜菜任食，另每位附送前菜、雜錦刺身、天婦羅等。
嵯峨野（23134215）
地址：尖東麼地道72號香港日航酒店1樓