泰國個軍隊總司令趁總理他信去咗聯合國開會發動政變，搞到亞洲個市緊張起嚟，不過，啲錢就話走咗嚟香港，唔好理真定假，總之港股就升咗166點收市，報17512，成交仲大幅增加到300幾億元，按照師傅教落嘅秘訣，「成交走喺大市前面」，咁樣今日個市仲可以睇好，如果成交冇縮，恒指升破17600收市，咁就齊齊炒個市上18000關。
中移動C輪9123：個市炒高，都係要靠大隻指數股，中移動（941）昨日高收54.10元，升3.5%，係推高個市嘅主要功臣，成交超過15億元，「破腳穿頭」，咁好氣勢，應該會推去56元到58元嗰頭，隻C輪9123昨日收1.31元，槓桿率4.1倍（有效3.4倍），引伸波幅4.2%，可以買番的，正股升上56元，9123應該見1.46元，正股升到58元，9123應該唔會低過1.60元，正股企52.80元樓上唔使止蝕。
滙控C輪3441：滙控（005）減咗恒指比重後，仍然係最舉足輕重嘅股份，昨日滙控低開下試50日線後，隨即見買盤撲出嚟，最後升到上140.80元收市，高低位相差成2元。股價下試咗50日線反彈高收，係短線見底嘅Signal，補番個幾禮拜前個裂口，照計都會試吓先嗰排嘅高位142.10元，破咗關就睇145元。隻C輪3441昨日收50仙，槓桿率28.2倍（有效12.8倍），引伸波幅14.9%，對沖值0.45，正股上試142.10元，隻輪睇56仙，正股破位炒上145元，輪價應該喺70仙樓上，正股碌番落139.50元樓下沽出止蝕。
俊 樺