上個禮拜，孫柏文去咗馬來西亞吉隆坡，出席亞洲區自由市場智庫會議。喺吉隆坡開會嘅時候，就有機會再遇上一位喺印度搞咗自由市場智庫好耐嘅前輩。每一次見到佢嘅時候，佢就好似一個喺前線戰鬥咗好多年嘅老兵，同我呢個得幾年戰鬥經驗嘅新丁，分享推廣自由市場主義嘅經驗。
今次我有機會遇到佢，當然即刻捉住佢傾下偈。
話題起初圍繞着中印兩國經濟起飛帶來嘅問題，傾呢個話題嘅時候，就當然會談及關於能源同環保嘅問題。講到呢度，佢就突然間神色凝重咁同我講：「孫柏文，你推銷改革嘅時候，一定要確保改革係貫徹到底，如果唔係咁，反對改革嘅死硬派，就有機會指指點點。」呢位印度前輩，原來係講緊關於削減燃油補貼嘅改革。
從錯誤中學習
首先，大家要知道燃油補貼，會令到出現燃油大幅浪費嘅情況。既唔符合成本效益，又會產生大量環境污染，所以我哋班自由市場智庫，都好反對燃油補貼。佢話，佢哋喺印度成功爭取大幅削減燃油補貼，不過，因為政治始終都係妥協嘅藝術，反對改革嘅死硬派，就成功保留主要用來煮食「火水」嘅補貼，因為話係「必需品」，而用來開車嘅「電油」、「柴油」，啲補貼就被削減。
原先都非常開心，點知因為經過補貼改革之後，火水比起其他燃油平咗好多，啲人就開始用火水開車。不過，用火水開車能源效率係非常低，最後，政府補貼仲要多咗，因為火水用多咗好多。仲有，因為火水冇完全被引擎燃燒，所以排出嘅污染物又比以前多好多，所以要去到連火水嘅補貼都冇埋，先至可以算成功。有時，改革嘅道路就係咁樣，要從錯誤中學習，先至可以有決心貫徹到底。
噚日孫柏文非常慶幸，隔籬「國際金融」版王冠一前輩喺佢寫作嘅專欄《國際視野》裏面，又有對小弟畀啲我非常感激嘅提點（大家可以到我哋嘅《蘋果網站》，「昔日新聞」裏面睇番）。當中特別有一句，冠一兄話：「若能虛心學習，假以時日，必非池中物者」，就燃點了我嘅希望，希望可以他朝好似冠一兄一樣，成為一個頂尖嘅財經評論員。
我諗到呢度，就聯想起小時候一次聽過嘅對答。以前有一次，孫柏文仲係好細嘅時候，有機會跟住我老竇走去沙田馬場嘅馬房區裏面睇吓。馬房區裏面，特別係那些大馬房，都有自己嘅獨立練馬「小沙圈」，而為了安全，每一個「小沙圈」都被成年人心口般高嘅圍欄重重包圍住。咁我去參觀馬房區當日，有機會走過兩屆冠軍練馬師「大衛希斯」嘅馬房，走過的一刻，突然聽見有人大聲sayhi，同埋叫我老竇個名。
老竇同我就望向聲音嘅發源地，一望就見到「大衛希斯」揮手，喺佢隔籬就有一位好像行動唔方便嘅伯伯挨住啲圍欄企。老竇一見到個老伯，就即刻望住我話：「嚟，我帶你去見一位傳奇人物！」老竇同我走到去「大衛希斯」同個老伯嗰度嘅時候，我老竇就同佢哋開始傾偈。原來企喺「大衛希斯」隔籬嘅老伯，就係「大衛希斯」嘅老竇「哥連希斯」ColinHayes。「哥連希斯」本身都係一個練馬師，仲要係喺澳洲連續做過超過十屆（多過「大衛希斯」）嘅冠軍練馬師。
「當然係我叻啲」
咁當日令到孫柏文記憶猶新嘅對答，就係正當「大衛希斯」又一次開玩笑，話自己有幾利害嘅時候，我老竇就帶半點挑釁性咁問佢一句：「大衛你咁牙擦擦，究竟你練馬叻啲，定係你父親叻啲？」問完，「大衛希斯」即刻陰陰嘴笑，望住佢老竇「哥連希斯」話：「當然係我叻啲！因為我師傅勁過我老竇嘅師傅，我師傅就係「哥連希斯」！」講完之後，希斯兩父子、我老竇同我四人都一齊抱腹大笑。
冠一兄的話，點解會令我諗起呢個故事？因為他朝冠一兄退休之後，我又可以成「非池中物」嘅話，我都希望可以開玩笑咁話：「當然係我叻啲！因為我有王冠一兄作為我嘅良師益友！」
孫柏文