教育統籌局噚日搞咗個青年論壇，煲呔同行政會議成員范鴻齡Henry都有去同學生對話。邊個得到嘅掌聲同笑聲多啲？竟然係知名度冇咁高嘅Henry，好出人意表喎。
梗係啦，煲呔嚟到，讀完篇四平八穩嘅肉麻稿，跟住對住貓紙答三、四條預設問題就拍拍籮柚走人。
Henry不單完全無稿，仲好輕鬆咁講咗喺中資機構求生之道同工作軼事，又容許台下學生任問唔嬲，氣氛相當輕鬆，煲呔輸咗呢仗都心甘命抵啦。
87年已經加入榮太子間中信泰富嘅Henry仲塞錢入學生袋，叫佢哋第時若要喺中資機構打工，一定唔可以駁嘴駁舌，因為佢哋好有階級觀念，之不過，大家仍然可以喺唔損害上司面子時進言嘅。
原來Henry以前試過俾人賄賂，好彩佢無接受到，否則至今都仲要受嗰個人控制。佢又話公司喺89年「六四」之後最難捱，因為唔少銀行都向佢哋收緊信貸，公司惟有賣咗部份資產以維持運作。有學生膽粗粗問佢會唔會選特首，Henry好堅決咁答「唔會」。唔知呢個答案，會唔會令啲學生失望呢？