煲呔口大大話放棄積極不干預政策，俾人話數典忘祖，日前嘗試撰文解畫，點知唔單止愈描愈黑，而且中、英文版本仲有出入，中文版無啦啦冇咗段何謂「大市場、小政府」嘅解釋，俾民主女神余大狀質疑佢唔知搞乜鬼。
噚日煲呔喺禮賓府設宴，咁啱同余大狀同枱，煲呔就乘機澄清。佢話嗰日篇文係寫咗英文版本先；點知譯完做中文版，想交畀報館刊登時，先發現中文版字數太多，報紙登唔到，咁佢啲手下惟有幫佢cut咗啲。
點知好cut唔cut，cut咗余大狀覺得好有意思嗰段，真係無法子；但係咁求其，充份反映煲呔點睇呢個政策。
講嚟講去，煲呔都係想叫余大狀唔好有咁多陰謀論啫，據知余大狀聽完後冇乜特別反應，煲呔又功虧一簣喇。