許冠文一年之內辦兩場盛大婚宴，四月嫁女，九月中娶新抱，佢兩公婆唔知有冇攰死，唔係講笑，每次都喺洲際大酒店請飲，每次近六十圍酒菜，錢就係小意思啫，籌辦過程嗰鋪麻煩法先至令人身心俱疲，淨係請客名單之安排，已經容易得罪人。
左丁山上次因為去咗旅行，冇出席許冠文嫁女之宴，呢次佢娶新抱，唔可以再唔到場。記得約三年前同許氏夫婦食飯，許冠文話患上父親焦慮症，驚住個女嫁唔出，當時佢話：「啲同輩朋友打電話嚟，猛咁邀請我個仔去認識佢哋個女，都冇人邀請我個乖女出街嘅！我一定娶到新抱呀，只怕個女搵唔到好男仔啫。」我哋笑佢過慮，再擔心落去，就要學曾智華、林建明咁，去搵李誠教授。
言猶在耳，𠵱家米高風騷咯，九月十六日晚，食翅之後，許公子思維（水果撈老闆，在內地有三十間店）上台，憑歌寄意，唱咗三首情歌令新娘十分感動，新郎唱歌有板有眼，屬超業餘水準。問黎小田：「許公子啲歌喉值幾多分？」黎小田話：「我由細睇到佢大，佢唱歌相當唔錯。」許公子唱完，向賓客宣布：「今晚節目，現在正式開始，請許冠文先生！」嘩，米高一個箭步上台，猛話自己心情開朗，春風滿面，千金已經懷孕，今年或明年初可以做阿公，今日嗰仔結埋婚，新抱（陳潔萌Christina）係廣告公司BBDO客戶經理，瑪利曼書院、城市大學畢業，可以幫嗰仔嘅「水果撈」搞公關宣傳，佢一萬個放心咁話！
當晚婚禮司儀發言比較少，賜官話：「今晚咁多金牌名嘴坐響度，許冠文就係師公、盟主，仲有黃毓民，棟篤笑王黃子華，叻哥陳百祥等等，司儀識做啦！」左丁山笑佢：「點解唔講埋有《雙星報喜》第一代編劇阿賜官！」
講完一輪，主人家敬酒，左丁山捉住許太問：「就快做阿婆嘞，希望幾時抱孫？」許奶奶春風滿面咁話：「出年啦！」