繼《見多你一面》經典廣告後，sell溫情一向有一手嘅滙豐銀行又有新猷。
先排搞咗個「情感萬花筒──您與滙豐的相片分享」，叫佢哋班客仔將啲同滙豐有關嘅相，加埋文字講個背景故事，同埋對滙豐嘅感覺，一齊重溫同滙豐度過嘅難忘片段。
噚日三個組別終於選出得獎作品，其中華華最鍾意、最有共鳴嘅係《最天真可愛時刻》個張（圖一）！無他，香港差不多個個細路仔，都會試過擺同一個post影呢張相囉！分別只係你騎住抑或挨住「史提芬」定「施廸」（滙豐門口對銅獅，由1935年開始駐守香港滙豐總行大廈）之嘛！呢張得獎相片由王美芳女士拍下，相中人係佢對小朋友，出鏡嘅獅子係「史提芬」。
至於另外兩組得獎作品──《最開心快樂時刻》（圖三）由張漢傑提供，相中人係佢媽媽同埋佢一對仔女，時為53年前，地點係第三代滙豐總行前面，當時正值慶祝英女皇登基，總行前面於是升起英聯邦國家國旗。
《最刻骨銘心時刻》（圖二）係由馮淑雲提供，當時（1978年）佢同男朋友第一次約會，去中環睇聖誕燈飾，行到滙豐外面，男友好耐心教佢點影滙豐外牆的燈飾……馮女士話，感謝滙豐「燃亮」佢兩個第一次約會……係咪好sweetsweet呢！
