【本報訊】全國人大常委曾憲梓次子曾智雄婚變，事涉楊姓女藝人。醜聞中的男主角公開現身，力指是妻子吳嘉寶主動提出離婚。曾智雄說，楊姓女藝人之中，他只認識楊采妮，但矢口否認離婚與她有關。楊采妮也聲稱與曾智雄僅屬普通朋友：「呢啲係人哋家事，唔關我事。」 記者：蔡元貴
「金利來，係男人嘅世界。」曾憲梓家變外傳，醜聞男主角曾智雄受父親之命，在金利來集團中心面對傳媒，公開婚變前後的內心世界，交代與妻子吳嘉寶的離婚詳情，交代與傳聞中楊姓女藝人楊采妮的關係。記者會昨日下午2時45分開始，大批記者在金利來中心門外等候。
曾智雄：唔知邊個姓楊
記者會很快踏入正題，吳嘉寶前日在報章刊登了一份「分居啟事」，指曾智雄與女藝人楊小姐發展婚外情，令雙方十八年婚姻破裂。曾智雄斬釘截鐵的說：「無，無第三者，申請離婚理由唔涉及第三者，我唔知邊個姓楊，我都好愕然，因為呢件事有藝人俾人煩到，我都唔知點解。」
記者反覆追問曾智雄與楊姓女藝人的關係，曾智雄有問必答，一直保持笑容，對答如流：
記（記者）：楊姓女星你識邊個？
曾（曾智雄）：楊采妮，報道都有講，佢係我細佬個朋友，我見佢都三年前嘅事，我都識佢前男友，都見過一、兩次。佢，普通點頭朋友都未必係。
記：楊玉梅、楊恭如識唔識？
曾：唔識，我同電影界、娛樂圈唔係好多接觸，之前請容祖兒、Twins做活動大使都係社會公務上接觸，香港所有女藝人，無一個女藝人電話我有，除咗小恩子（黎瑞恩），我細佬個老婆之外，以前無𠵱家都無，由我香港長大到𠵱家都無。
記：你唔想知點解有呢個楊姓女藝人？
曾：根本無呢回事，點解有呢個公告我自己好清楚，問我一百次我都話唔知。
強調妻子越洋提出離婚
記者會長達一小時，曾智雄多次指出，離婚是太太主動提出：「04年4月2日，我收到一份由加拿大律師發出嘅律師信，正式申請離婚，04年10月申請人向香港去信申請離婚。離婚手續已經去到最後階段，而離婚理由係由02年5月開始，分居超過一年，就可以申請離婚，當時我有問過我太太，佢要離，大家唔可以一齊生活，佢有咁樣嘅意見，我當時同意，成件事就係咁簡單。」
捲入緋聞的女星楊采妮昨日傍晚離開香港飛往新加坡，她接受本報電話訪問時解釋和曾智雄的關係：「大家只係普通朋友，我只係識RickyTsang（曾智雄），而呢位曾生只係朋友嘅親戚，我哋兩個冇直接聯絡。」
楊采妮前男友邱韶智的爸爸，原來曾是金利來在新加坡生意上的合作夥伴。她被問及捲入此事可覺得無辜時說：「唔可以話無唔無辜，呢啲係人哋家事，唔關我事，我絕對唔會介入人哋屋企。」
曾憲梓：我支持我個仔
次子爆出婚變醜聞，曾憲梓下令曾智雄公開交代，他本人昨晨則如常到沙田馬會會所泳池游泳。到了昨晚，他在妻子及兩子智雄、智明一同出席潮屬工商界國慶酒會，被大批記者包圍追訪家變事件。曾憲梓說：「總之我支持我個仔，家事呢啲嘢，最緊要和氣。（怕唔怕影響聲譽？）唔怕，咁嘅事都影響到，邊得了？（支唔支持個仔同女藝人發展？）唔關我事！」
對於即將不是新抱的吳嘉寶，曾憲梓說：「有緣份就做我新抱，冇緣份就做我個女，做我家嘅人，自己人又好，外人又好，我都要關照。」他還說，沒有因兒子婚變的事而影響心情：「我死老竇都好開心𠺝！點解唔開心？」
曾老太談家醜臉有不悅
家姑曾黃麗群則沒有老爺般寬心，記者提起二新抱，她的臉色有點不悅：「佢哋結咗婚之後就搬出去，一個月先見一次，好少陪我。」對於報章的啟事，她說：「佢（吳嘉寶）咁做我哋都冇佢符，冇辦法㗎喇。」曾智明則極力把婚變大事化小：「就算人大常委都要食飯同瞓覺㗎，我唔覺得件事好負面喎。正如一對男女朋友分手咁，好正常啫。」
堂堂國家領導人物爆出家變，消息瞬即傳遍兩岸三地。內地《信息時報》昨日以「曾憲梓次子婚變」為題，詳細報道曾家醜聞，文章並無以人大常委尊稱曾憲梓，只冠以金利來主席的商人稱呼。
