買樓係人生大事，負責幫手搵樓嘅地產經紀，可算係媒人，佢哋表現唔稱職，有時大好「婚事」會搞到一肚氣。
好似網友conmaglh2喺《香港討論區》入面，就以「十個做地產經紀的，九個半係衰人。」為題，大鬧經紀「真係唔明佢地係要將偷呃拐騙算入佢地嘅工作範圍裡面」，雖然文中並無講到事件嘅來龍去脈，不過言論咁偏激，即時引起網民嘅興趣，超過2600人次瀏覽外，仲有70幾個回應𠻹。
Aprilkaka話：「衰人好多行都有，又唔可以咁偏激。下次做買賣小心啲，咁就可以避免畀人呃啦！……人哋都係搵餐晏仔啫。」
anson303：「叫人去睇樓，話有KEY，點知去到係開唔到！」
一般老百姓：「睇樓前話睇到海景，上到去果然有海景，但就係一線海景，如果對面樓曬衫出嚟就只見到件衫，我個刻好想叫佢中落個海度畀我睇！」
spliu話：「經紀如果幫你搵到錢，你會唔會將你所賺嘅一份畀佢呢？蝕錢你就識鬧佢，咁好人真係難做啦！」
303宗投訴25%成立
大花貓回應：「我初做Agent時，畀個良心出嚟，盡心盡力咁完成一單交易，點知買賣雙方都劈我佣，重要遲成個月先畀，真係以為自己做緊乞兒。」
回佣王話：「有衰客，就有衰Agent。」
網民對經紀嘅評價毀譽參半，至於地產代理監管局就上述題目，攞咗啲數字畀大家參考，今年1至6月，監管局已完成處理的投訴個案為303宗，其中77宗（約25%）的投訴成立。照咁睇，「十個做地產經紀的，九個半係衰人。」似乎誇張咗啲喎。
報料電郵：[email protected]