內地影帝姜文有個法籍老婆仲生咗個女，上年兩人傳出離婚，而年前佢同內地女演員周韻拍拖之後，噚日內地消息話周韻上周五喺北京一間醫院，為姜文生咗個男嬰，母子平安，記者想搵姜文求證，但佢一直冇開電話。
應承負責任
姜文拍《綠茶》時曾經同趙薇傳緋聞，但好快就冇晒聲氣，冇幾耐周韻就出現喺姜文身邊，原來佢哋算係同門師兄妹。周韻係2000年考入中國戲劇學院，佢嘅老師張仁里即係姜文嘅恩師。拍完《天地英雄》之後，姜文同周韻撻着，後來兩個仲合作拍攝《理髮師》。
到今年5月底，一度傳出周韻懷孕，後來仲有內地傳媒影到姜文，拖住腹大便便嘅周韻喺佢嘅北京工作室附近出現，後來有傳姜文話一定會對佢兩母子負責，𠵱家就連仔都生埋。雖然周韻經理人王京花承認周韻生咗全面休息中，但拒絕回應BB老竇係邊個，事實都已經唔使佢講啦。