中華煤氣（003）執行董事兼營運總裁關育材，除咗管理了得外，原來佢嘅投資眼光同佢大老闆──中煤主席李兆基一樣銳利。話說佢未做中煤董事之前（大約97年左右），就識得買中煤，仲一路揸到𠵱家！佢話，當時已睇好中煤嘅前景。
到底呢隻股呢幾年有幾勁？華華翻查股價，原來97年最高約10元，最低約7元，平均8.5元，噚日收18.22元，關生賺咗一倍！成績勁過好多基金經理！
中煤05年年報寫住，關生揸住7.74萬股中煤，以噚日收市價計，值141.08萬。華華問關生仲會唔會增持？佢話，唔係咁方便公開答呢啲咁敏感嘅問題，仲叫華華不如去問四叔啦！華華覺得兩個都要問。
華華仲問關生，除咗呢項跑贏唔少指數同基金經理嘅投資項目外，仲有冇其他投資心得，可以同大家分享？關生話，相對中煤，佢覺得自己有一項投資仲犀利，就係佢個寶貝女啦。