對於只租樓不會買樓嘅人嚟講，供樓要畀息，開支又大過租金，壓力又大，諗唔過，本來係好正常嘅想法，但係最近蘭西喺網上討論區，發現有班淡友話，供樓供十幾甚至30年，層樓供得斷都貶晒值啦云云。好多商品都會隨住年月消耗而貶值，但係對於物業，尤其係香港樓宇，似乎唔係太適用。其他唔講，淨係一個荔枝角美孚新邨，已經可以完全推翻呢班淡友嘅理念，更唔好講一啲半山老牌豪宅，遇啱時勢，數年內樓價翻幾番，絕對唔係天方夜譚。
就以西半山聯邦花園為例，樓齡34至35年，即使好多單位都冇晒海景睇，𠵱家呎價仲要5000幾到6000幾蚊呎，拍得住同區一線豪宅中低層個價。美聯馮劍釗話，啱啱做咗單成交，威尼斯閣低層D室，1350呎，795萬元，連車位，呎價5889蚊，仲貴過家陣賣緊嘅土瓜灣翔龍灣。賣家99年買入價605萬元，7年間樓價升值31%，賺咗190萬。
當然，如果個原業主03年賣樓，隨時要輸錢，不過，買樓畢竟係投資嘅一種，量力而為先最重要，有實力就有水位，就係咁簡單。
電郵地址：[email protected]