8號仔電盈上個星期先公布半年業績，好多人都想知點解副主席蘇澤光（JackSo）咁着數（Jackso）。今年3月同電盈續約多三年，可以大幅加薪25%到年薪1875萬元。最騎呢喺新合約上，無端端多一條條款：大股東一旦變動，只要三個月通知，就可選擇提早退休，仲可收埋餘下任期或一年薪酬。佢當時畀咗一個好「高」解釋，就係多得一個好律師。
原來好戲在後頭，噚日聯交所資料顯示，JackSo突然多咗3150萬股電盈，梗係唔係天跌落嚟，睇真啲除咗電盈送畀佢嘅2500萬股認股權外，由7月25日開始，嚟緊三年，每年仲有二百幾萬股落袋，三年合計650萬股，仲係唔使錢嗰隻。
JackSo喺03年7月25日加入電盈，當時主席李澤楷話，分三年送648.3萬股電盈畀佢；𠵱家時間咁蹺，睇嚟都係二少私人醒。以噚日電盈收市價4.87元計算，佢荷包又多咗3165.5萬元。
唔怪之得電盈旗下嘅香港電話，獲得政府兩份大型技術外判合約，為期10年合共總值8億元，為民航處同埋海事處提供支援服務。華華現場見到JackSo，搵埋經濟及勞工局局長葉澍堃撐場時，可以笑到見牙唔見眼啦！
可惜JackSo哥哥噚日唔知點解唔肯同記者傾偈，丟低葉局長就「閃」咗，睇嚟都係驚大家要佢介紹佢嗰位咁醒嘅律師囉？
咁客家變地主嘅葉局長有咩講？除咗重複又重複咁提住，無人請佢座「戇平」吊車外，講到兩電專營權談判，佢話談判緊……咁有咩進展？有進展……所以話呢，官腔，響正常情況下，幾時都係穩陣過上市公司嗰班話事人嘅！
李華華
[email protected]