今晚戲碼都好強，賭仔入完馬場賭完馬，瞓一陣，夜晚又可以起身睇夜波，皆因深夜時分可謂大戰連場，先有意甲羅馬主場對國際米蘭，晏少少仲有利物浦主場對紐卡素呢場宿怨大戰，球迷睇好波之餘，又可以賭餐懵。
宿敵對賽入球唔會少
講開利物浦同紐卡素呢兩支宿敵對賽，每逢對撼都勢必火藥味濃，入球都唔會少得去邊。記得95至96同96至97兩個球季，利記都喺主場贏對手4:3，嗰兩場波球迷應該仲記得，都係喺最尾1分鐘先分到勝負，今晚呢場大戰，有幾期待都唔使多講。
不過利物浦近期大鬧入球荒，已經有成315分鐘入唔到波，希望唔會搞到呢場經典大戰褪晒色。賽前利記領隊賓尼廸斯就話球隊仲有機會攞聯賽冠軍，咁啱嗰邊紐卡素近排「弗」番，都係過咗呢關先再講偉論啦。
當年兩場大戰嘅球員好多都已經離晒隊，𠵱家利記只係淨番前鋒科拿，紐記嘅老鬼中場奇勒亦仲喺陣中。不過球迷今場應該都睇唔到佢兩個同場再鬥喇啩，一個就31歲，一個仲33歲㖭，但係科拿上陣機會可能大啲，話晒都係紐記剋星！
「今晚有幾場大戰上演，球迷日日做到冇停手，夜晚有幾場好波睇吓，都算叫做有啲調劑；希望利物浦同紐卡素交足功課，唔係捱眼瞓嘅球迷實媽叉㗎！」