中遠控股噚日公布中期業績，董事長魏家福被問及本月6日同李嘉誠見面傾乜嘢，佢話當日超人凌晨一點從新加坡趕返香港，就係為咗佢哋嘅會面。佢當日大讚李生捐咗三分之一身家做善事，差不多四百億，實在係中國人嘅驕傲。中遠亦不甘落後，成立咗國企首個慈善基金，撥款1億人民幣，用嚟提高國內貧窮地區同西藏人民生活水平。
其實中遠除咗做善事，財技亦十分了得。上半年好多國企紅籌因股改，導致額外損失數以億元計；雖然中遠今次中期亦因此出現5.1億損失，但呢筆數可以喺未來年半內完全回撥，因為佢哋唔係用現金或發新股畀散戶，而係認沽權證，年半內行使價約8.8人民幣，但𠵱家嗰隻A股市價已在十蚊樓上，根本唔會有股民向佢哋行使認沽權，佢哋可以不用分毫，就可以處理咗呢個棘手問題。