中原集團噚日喺尖沙嘴美麗華酒店頂樓舉行全民大會，有成800幾個管理層出席，聽執行董事張奕威講，主要係回顧集團嘅歷史、總結發展經驗同埋宣揚企業文化。佢話今次係第一次成個集團嘅中層管理人員都齊集開大會。
所謂中原企業文化，即係近排主席施永青成日講嘅自組織，就係無為而治咁解。蘭西問張奕威，話中記在野股東王文彥喺網頁嘅文章提到「好似只係施生至可以咁做喎」，張奕威回應，同事唔跟住做，係因為若果唔做嘢就會俾市場淘汰；況且公司有機制若做到成績，同事會有回報，所以今次大會另一個重點，係令下面同事有做嘢動力，咁啲前線收到未？
張奕威又講，中原地產同利嘉閣不時都有爭拗，前線又時常互相過檔，但好少投奔對手，估計係大家都認同施生嘅管治風格，自然唔會加入對手嘅陣營啦。