無綫姐仔陳敏之前晚駕駛其價值約25萬元的四驅車，途經銅鑼灣蘭芳道時，疑被前面一輛七人車退後泊位時撞向其車頭，陳敏之遂與七人車的中年司機理論，索償1,500元，豈料對方聲大夾惡，當街斥喝陳敏之，嚇得她眼濕濕兼六神無主，只好報警求助。
現年27歲的無綫姐仔陳敏之，前晚10時左右在銅鑼灣接受報章訪問後，駕駛其於00年購入、價值約25萬元的黑色四驅車途經蘭芳道時，與前面一輛黑色豐田七人車發生輕微碰撞，陳敏之座駕車頭近車牌位置被撞凹，出現兩處如五元硬幣大小的花痕，而對方車尾也有少許被撞花。
「我冇錢畀你㗎」
發生碰撞後，陳敏之即報警求助，本報記者抵達現場時，陳敏之和七人車司機已將車泊在路邊，但兩人仍在爭拗中。就現場所見，駕七人車的司機阿叔十分勞氣，指手畫腳，陳敏之則如驚弓之鳥，非常徬徨，當警員將二人帶到一邊問話時，阿叔依然向她大聲斥喝：「唔好話千五定二千五，我都冇錢畀你㗎啦。我打工㗎咋，邊度有錢畀你呀！」
被阿叔嚇驚的陳敏之即時眼濕濕鼻紅紅，差點兒掉眼淚，但結果對方也答應賠償1,500元了事。事後陳敏之接受記者訪問時說：「我今日拍完劇嚟利園做訪問後揸車走，出到路口時，前面有架七人車見有個位就即刻退後，我已經響晒按，但佢都撞到我架車，嚇咗我一跳。我冇受傷，但司機一落車就鬧我話：『有乜可能我架車撞到你㗎？』好惡呀，好驚吖嘛，我咪即刻打畀朋友，佢叫我報警，阿叔仲係咁鬧話：『我點會撞到你？你架車冇理由跟咁貼！』喺度無理取鬧。」
賠償1500元
陳敏之續說：「警察嚟到都話佢唔啱，阿叔態度至好番啲，要佢賠1,500蚊，又話冇錢，要出糧10月1號先有。我知佢係打工，唔想趕盡殺絕，之前佢態度唔好，但最尾佢肯認自己錯，都肯道歉。」她表示駕車以來從未發生過意外，故確實感到慌張。
採訪、攝影：娛樂突發組
