陳南祿做咗馬會新董事，果然識做，趁佢間大寶號國泰航空慶祝60周年，今個禮拜五傍晚搞咗大型活動，在沙田馬場個沙圈請晒城中名人去睇騷。聽講有好多藝術表演助興，仲請埋特首到場。咁國泰母公司太古雖然都係鬼子佬揸Fit，畢竟唔係廸士尼又唔係吊車，啲高官係會畀面嘅；何況仲有馬會呢個牌頭㖭，鋪開張紅地氈，煲呔肥龍唐司長都有機會捧場嘅。
其實國泰舊年都有贊助沙田賽事，大陣仗到霸咗半個停車場做宣傳。以往，馬會同怡和關係比較密切，太古就一直疏離；現在怡和政治唔正確，國泰就取而代之。君不見集團主席何禮泰前日在北京受到高調接待，唐家璇同佢握晒手，又話希望太古在香港未來發展發揮更積極作用云云。咁搞好馬照跑嘅活動，都係一種積極行動，所以國泰同馬會一定有更密切嘅合作。