信德集團（242）喺9.10至10.50元橫行咗兩個月，最近幾日似有向上之勢，散戶開始對佢有興趣，隻股噚日收9.63元，升10仙。
「Yahoo討論區」內，網友angellam630話喺9.28元買咗，想知呢個價安唔安全？股價會唔會再升？另一網友clarksonhk認為，242係隻好股，澳門概念股中嘅佳選，長線冇問題。Dickkwo就話：「呢隻嘢𠵱家我覺得最主要都係睇地產項目嘅增長，賭就冇咩㗎啦，不過佢前兩年買咗啲地，馬交樓升嘅話就買啦。」
信德月初公布中期業績，盈利升23.7%，勝過市場預期。
業績公布後，有7間大行出報告，其中只有花旗唱淡，認為集團間接持有嘅澳博，喺澳門賭博市場佔有率將大降，影響收入。
另外6間大行則唱好，看好者觀點主要係睇好集團澳門的物業收益，認為澳博佔信德資產淨值不多，不會嚴重影響信德的投資價值，其中UBS更將目標價定喺14.17元。
技術上，信德股價重上保歷加通道中軸，現價風險有限，跌穿9.10元止蝕，短線先睇10.50元，下一站11.25元。
余文