啲人成日話豪宅有升值潛力，值得投資，但係成本大唔係人人啱玩，大家不如留意吓啲市區細價樓。中原陳寶華向蘭西報料，話最近深水埗區成交幾旺，3日內連續錄得3宗成交。
其中一宗係金濤閣高層B室，538呎，以148萬成交，呎價2751蚊。唔好以為深水埗樓一定係舊樓，金濤閣樓齡只有6年，都幾新淨，加上望西九龍開揚景，買家考慮咗兩個禮拜就拍板。
另一個係僑輝大廈高層D室，407呎，90萬有交易，呎價2211蚊，樓齡23年，舊就舊咗少少，不過市區樓有咁平呎價，都算唔錯。不過最抵都係呢個，恆威閣中層A室，456呎，投資者用80萬承接，呎價1754蚊，樓齡只係12年，買家見平平哋，用嚟長線收租，陳寶華話，𠵱家同類單位月租大約4500蚊，計落回報有成6.75厘，搞到蘭西都心郁郁想買番間做吓包租婆。