前排新盤陸續開售，蘭西日日見到啲經紀唔怕日曬雨淋，身水身汗不停咁拉客，當然喇，力不到不為財嘛！美聯有位經紀就親身做咗個好例子。
美聯林少峰同蘭西講，政府上個禮拜拍賣荃灣青龍頭幅地，成交價理想，附近啲豪宅業主都即刻放盤，希望借利好消息賣個好價錢。佢哋啱啱成咗個青山公路清麗灣別墅全海景雙號屋，面積2330呎，成交價850萬，呎價3648蚊。原業主02年用500萬向銀主買入，今次轉手勁賺350萬，升值70%。
業主好眼光當然抵讚，不過有個人仲抵讚，就係促成交易嘅美聯梁永政James。原來當日業主身在上海，James為做成呢宗成交，不惜遠赴上海，送定金畀業主。業主見到James咁風塵僕僕，走到嚟上海咁有誠意，唔單止答應呢宗交易，仲大讚James有以客為先嘅專業服務精神。
其實呢宗成交銀碼唔算大，七除八扣，相信James袋落袋嘅佣金都唔係咁多。不過，跟得緊做得好，人哋下次自然返嚟搵你幫手，到時就長做長有，各位經紀好好學嘢喇！
電郵地址：[email protected]
