台北上星期五夜晚有百萬人上街大遊行，包圍總統府。第二日有線電視訪問一位參加遊行嘅市民，市民揸住張報紙，露出全版彩色大遊行圖片，左丁山見到畫面，立即同老婆講：「訪問呢張係《蘋果日報》！」老婆半信半疑：「唔畀係《中國時報》嘅咩？」幾秒之後，鏡頭移至報紙左上角，果然見到《蘋果日報》嘅報頭。左丁山之所以咁肯定，係因為《蘋果》素以圖片取勝。○三年七一大遊行，五十萬人上街，七月二日《蘋果》就印出全版大相，亦令讀者視覺受到震撼，台灣《蘋果》老總阿堅哥經驗豐富到極，焉會不知，相信九月十六日之《蘋果》必在台灣賣斷市，台灣人爭購，保存報紙作為紀念。百萬人上街，係台灣歷史創舉，和平理性非暴力，值得台灣人驕傲，左丁山在香港睇電視直播大拍手掌，猛咁轉台，有線、鳳凰、東森三個台輪流睇，最後發覺東森佔有地利，比較好睇啲。
廠家Ｌ周末回港，趕入馬場，碰到左丁山，問佢知唔知道台北百萬人大遊行，內地人有何觀感。廠家Ｌ話：「對唔住，電視冇得睇。凡有電視台播出台北遊行，無論係CNN或CNBC，畫面立即冇咗，政府全力封鎖，唔畀大遊行畫像傳入內地。你知啦，𠵱家內地貪腐之風，犀利過阿扁嫂多多聲，地方官太的威風，我都要巴結，你話萬一內地人受台北大遊行刺激，有樣學樣，咪好大件事！」
想落又係。上星期台灣人到凱達格蘭大道靜坐，唱歌，嗌口號，令左丁山想起八九年五月中在天安門行咗一個圈所見到嘅場面，當晚有一對法國夫婦話要去天安門見識，由中貿林做導遊，拉埋左丁山夜遊天安門廣場，法國婦人話從未見過咁和平輕鬆熱鬧嘅靜坐示威，與佢喺一九六八年在巴黎街頭擲石頭嘅場面相距甚遠。法國婦人重嫌中國學生理性得滯，欠咗啲革命熱情㖭。點知，點知我哋走咗之後半個月，就發生六四，至今猶有餘痛。