昂坪360纜車講咗九年，噚日下晝一點終於有驚冇險地啓用。第一日風光明媚，天氣甚佳，既冇落雨，亦冇打風，大家都好happy。聽講首日賣咗一千六百多張車票，好好生意；旅遊業議會總幹事董耀中估纜車會吸引多一成內地旅行團來港。
唔知班問責高官係咪怕天有不測之風雲，所以人人都避風頭唔出席。咁又係，360同廸士尼都係鬼子佬，所謂親疏有別，無謂長洋人志氣，萬一你停咗喺中間唔郁，咪阻住長官去同地產商食蟹飲酒。所以都係搵旅遊專員區璟智捱義氣頂住就算，反正廸士尼慶祝開業一周年，都係只派頭箍小姐一個人去做代表，今次又係佢，唔怕俾人話政府大細超。