由鄭少秋同陳寶珠主演、合共50場嘅舞台劇《天之驕子》，前晚喺沙田大會堂完成最後一場之後，終於圓滿結束，一眾台前幕後齊集沙田舉行慶功宴，大家都話好唔捨得，尤其秋官仲猛讚寶珠話：「我最大得着係同寶珠嘅友誼，佢好可愛，個人好好，我最唔捨得佢，唔怪得佢啲fans咁鍾意佢，咁長情啦！」問秋官咁講唔怕老婆官晶華呷醋咩？佢話：「天之驕子嘛，唔好理佢。」至於寶珠就回敬話秋官成日請佢食嘢，好開心。
激瘦10磅
其實秋官同寶珠為咗個劇都捱到瘦晒，好似秋官咁，佢瘦咗10磅，𠵱家得番150磅。雖然辛苦，但贏得好口碑，劉德華日前都去咗捧場，噚日仲放咗啲後台探班相喺自己個網度（網址： http://forum.awc618.com/showthread.php?t=1170）畀fans睇，大讚個劇係「超級A片」，即係A級好睇咁解。華仔留言話秋官同寶珠都係佢偶像，大讚秋官咁多年嚟都咁風流瀟灑之餘，仲好欣賞寶珠姐嘅反串扮相㖭！
