負責拯溺員訓練與資格考核的香港拯溺總會主席陳偉能說：「我哋訓練時都會強調，雷暴警告時唔應該落水，因為呢樣涉及人身安全。所以沙灘打風行雷就會扯紅旗，露天泳池亦都因為面積大、空曠而唔應該開，救生員都唔應該留喺戶外，就算喺池邊洗池都唔好，一樣有危險，唔係淨係落水先有，所以雷暴警告期間有呢啲要求，可視為不合理指示。」
港九拯溺員工會副主席郭紹傑亦指出，在雷暴警告期間要求救生員洗池不合理。「梗係有問題啦！雷暴警告期間要喺露天泳池邊洗池，又風又雷又滑，危險性高好多。」
郭紹傑補充：「康文署都有指引，雷暴警告期間，救生員可以到有上蓋地方暫避，不過私人泳池就好睇現場主管判斷，因為法例未有規定行雷一定要封池，所以我哋都唔可以強迫市民上水，只能夠用廣播提醒泳客雷暴下游水有危險，然後自己就喺安全地方離遠睇住，如果泳客真係出事，我哋都會去救。」