先賣吓廣告，〈蘋果波經〉呢排氣勢如虹，投資版捷報頻傳外，禮拜日頭版大字標題阿仙奴反底打敗曼聯開W，3.75倍得手！喺度要恭喜名家青蛙仔轉型成功，上個禮拜六中完老樸1:0，再冠絕全港敢貼阿仙奴破數據贏波，呢份勇氣冇幾人可做到，波友近排真係要盯緊佢嘅英超貼士！
今日我想同大家研究吓賭亞洲盤（或者稱讓球盤）中，愈嚟愈多人講嘅「鬼盤」。波友有需要，我哋嘅波經版都會闢個欄吹吓水，但係要認真到攞嚟當重心貼士，個人抱極大懷疑；尤其係精細到因為原本「中水」，𠵱家莊家開「高水」，所以咪掂，就仲騎呢。
水位偏筍≠鬼盤
舉個實例，上周中本人喺呢個欄推介伯明翰上盤，聽到有貼波專家叫咪掂。其實一場波各有捧場客，百家爭鳴，言之成理，畀波友一個參考，無傷大雅；但係呢隊波作客昆士柏流浪，根據主客和賠率推敲，而分析佢哋應該要讓平/半中水，但𠵱家只讓平/半高水（逾2倍）實在太筍，所以唔好買上盤，就摸不着頭腦（結果伯軍贏2:0）。
莊家最緊要有幫襯
須知全世界莊家對每場波有唔同睇法，一場波主客和賠率差距10至20個巴仙不足為奇，唔應該因為一兩個莊家開出嘅上盤水位偏筍，反而覺得「有鬼」而唔買。因為莊家都希望𠱁到你落注，最好收到對賽雙方注碼相若，咁先得到最穩陣嘅回報，街外放風叫你唔好買嗰啲「鬼盤」，咪無形中幫莊家拉勻注碼？
另一例子，維拉剛作客屈福特開平/半高水，英超中型班作客降班分子，盤路十多年來都係固定喺相若盤口，咁先吸引到兩邊有客幫襯兼必有交收（馬會穩陣開平手，結果0:0白做）。始終都係嗰句，捉緊某幾隊波全季走勢，堅持長追，方有穩中求勝之道。「有鬼」？使乜驚！（另提周中主力攻利記「主勝」一注）
文：蘋果波神