Game事撻：虛擬魚缸以假亂真3分鐘幫Mo仔換大屋

幾年前同朋友講想養魚，回應居然係︰「貴庚呀？錢多呀！」今日舊事重提，冇人再敢質疑，事關一套《海底奇兵》帶起瘋狂養魚潮！不過落手落腳Set缸未算最潮，如果你In到識用XB360，唔使3分鐘Set好缸魚，咁先稱得上係21世紀養魚太郎！
記者︰陸俊雄
攝影︰陳盛臣
ImageGirl︰Geneieve

用遊戲機養魚？其實講緊嘅係XB360最近出咗隻叫《AquaZone》嘅新Game。佢玩法唔係養魚鬥攞高分，而係一類叫療養心靈嘅靜態遊戲，同真實養魚一樣，要畀嘢佢哋食，好似真實養魚前嘅先修班，等新手熟悉晒所有養魚要點，Pass咗先去水族店買缸、買器材、揀魚，包你唔會一養就瓜。

■有埋羅馬柱呢類擺設，令魚缸豐富好多，好似幅畫咁。

鹹水魚代表

小丑魚
■遊戲內有成七種小丑家族嘅成員，包括新娘、番茄都有。

黃尾蝶
■旺角魚街常見品種，身軀龐大不過性格溫馴，唔會恰Mo仔。

淡水魚代表

神仙魚
■可以選擇嘅淡水魚中，以神仙魚最大條，想個缸有氣勢必揀。

紅蓮燈
■唔係魚街$18有一百條嗰啲呀，呢款「燈」斷條賣，貴啲㗎！

新手養魚四部曲

■1.先選定魚缸大小，最大可達三千升水，足足成幅牆咁大。

■2.再根據魚缸水量，揀個適合嘅濾水器、暖管等基本器具。

■3.裝好基本器具後，再落底砂、水草、珊瑚等豐富魚缸。

■4.一切揀好後，再按水質選擇養淡水或鹹水魚。

完成！
■最後由你親手設計嘅一缸魚就活現眼前。

初哥老手各有難度

雖然話隻Game好快就可以Set完缸魚，但唔代表佢簡單馬虎。由一開首，《AquaZone》已經有多款濾水器，根據唔同效能畀你選用；暖管亦有唔同熱能；光管亦有白燈同紫光之分。至於魚糧，有分初生細魚、鹹水、淡水，而藥水亦有分滴數，每滴含酸鹼多少等。其次係水草同珊瑚，淡水養水草，鹹水養珊瑚，有規有矩。不過講到最詳盡，都係「水質情報」，有齊水溫、酸鹼度、蛋白質、二氧化碳濃度等。初學者要花上唔少時間，了解清楚數值喺真實環境有咩影響，到日後真正養魚幫助好大。不可不提，啲魚有分性別，仲會生仔㖭！開始養住兩條先，等佢哋生隊足球隊出嚟都幾過癮。