呢個周中賽期係國內盃賽天下，聚焦周三晚英格蘭聯賽盃兩場賽事，熱選有主場出擊、可望喺英乙聯弱旅諾士郡身上取得大捷嘅英超聯球隊米杜士堡；冷選就搵另一場由英甲聯球隊唐卡士打主場對英冠聯嘅打比郡，博法定時間內開和局！
文：華度
投資特攻隊近期勢頭甚好，連環報捷，冷熱俱得手；今日輪到華度為大家做主打，決定贏就繼續「谷」！揀嚟聽晚聯賽盃場合，重注主隊米杜士堡穩贏英乙聯球隊諾士郡，再用「讓球主客和」米杜士堡「主勝」，串射同樣係聽晚聯賽盃場合嘅冷選，唐卡士打主場和打比郡。
「米堡」踢盃賽特醒
現時屬於英乙聯組別嘅諾士郡，今季表現其實唔錯，迄今於所有賽事踢咗10場，只係喺聯賽輸過1場作客波，其餘9場有5勝4和；贏波場次當中，包括聯賽盃上一圈，作客2:1擊敗高兩班嘅英冠聯球隊水晶宮！就係因為諾士郡咁叻仔，今日米杜士堡個主W，都叫做仲有啲揸拿。
雖然諾士郡今季戰績咁好，但兩軍實在有距離，米杜士堡比水晶宮仲高一班，同諾士郡足足有3個聯賽組別嘅級數差距；二來米杜士堡主場可靠，近兩季睇住佢哋喺唔同賽事，三番四次踢出鬥志，處於落後劣勢之下，識得踢出反勝對手奇迹，順境的話，大捷頻頻。其中原因同呢支英格蘭東北部球隊，攻擊陣容夠晒深度有關。
單計前鋒線，今季雖然放走咗一個哈索賓基，仍然有耶高保、維度卡、馬卡朗尼同基士堤4位有一定級數嘅射手在陣；中、後場方面，亦陸續有一班以英格蘭國腳達寧為首嘅後生仔湧現，包括中場卡達莫、阿當莊臣、占士摩利臣、後衞安祖戴維斯同巴廸斯等。
「主勝」1.75倍諗得過
所以，就算米杜士堡今場因為對手牌面實力偏弱，好可能會以部份副選應戰，仍可見佢哋都有足夠本錢，喺諾士郡身上大開殺戒！如果好似投資隊咁，唔介意贏得少，最緊要係贏的話，米杜士堡W絕無問題；好分頭啲嘅「讓球主客和」「主勝」1.75倍亦諗得過。想要食「大茶飯」，不妨試下波膽，米杜士堡贏「主其他」有17倍！
冷選場合，唐卡士打今季喺英甲聯表現唔算太好，暫時排名聯賽榜下游，但今仗有主場之利；對手雖係高一個聯賽組別嘅英冠聯球隊打比郡，不過打比郡同樣無勢，轉會期關閉前仲放走隊中死球專家伊廸亞基斯，以及攻擊中場湯美史密夫，戰力即時下降；近3仗只有勝和負各一，最經典莫過於今月初主場對新特蘭嘅聯賽，半場贏全場輸。
博唐卡士打和打比郡
再加上打比郡近年喺聯賽盃都冇乜貨賣，踢一、兩場就畢業。呢場博唐卡士打喺法定時間90分鐘內，憑主場之利打和打比郡，有3.2倍唔係無的放矢。
投資特攻隊金句
米杜士堡近季喺主場踢盃賽屢有佳作，陣容又夠深度，就算今仗出部份副選，都可望照炒低班球隊諾士郡。