政治學權威學者LarryDiamond噚日喺中大舉行講座，講講全球民主化嘅障礙。呢位教授本來唔係太為香港人熟識，但近期「鑽石教授」嘅大名愈嚟愈多人留意，點解？事關佢係葉劉淑儀喺史丹福大學嘅碩士論文導師；有葉劉不時hardsell，唔紅都幾難。
葉劉噚日盛裝出席捧老師場，只見現場人氣幾爆，唔單止好多中大學生湧住嚟聽書，就連縱橫政壇多年嘅李鵬飛以及中大政治及行政學系高級導師蔡子強都有出席，證明「鑽石教授」唔係浪得虛名。
不過，對葉太嚟講，現場都有個不速之客，就係一個姓張嘅中大學生喺講座場外抗議，投訴葉太嘅畢業論文唔夠水平，又話發現當中至少有兩大錯處，真係唔知嚟攞景定係贈興喇。
「鑽石教授」見慣民主，無受呢件事影響，繼續上台發表佢嘅演說。當然啦，學生嘅論文俾人踩到一文不值，點可以唔平反吓？事實上，咁樣即係話佢教得唔好啫，所以「鑽石教授」都力撐葉劉嘅論文寫得好好，完全無問題喎，葉太睇怕真係要多謝恩師挺身支持喇。