要數香港嘅潮州「架己冷」，最出名梗係超人李嘉誠啦，搞塑膠花搞到有個李家王國，仲令香港好似李家天下咁，你話唔巴閉就假喇。難得誠哥都無忘根，噚日成班潮屬社團同鄉搞咗個國慶酒會，誠哥都有出席做主禮嘉賓，真係畀面。
可惜吖，啱啱俾人揭發喺歐洲同紅顏知己周凱旋把臂同遊後，誠哥依然單拖出席酒會，無同周小姐雙雙出席，而且誠哥全晚都封嘴，八方都無辦法問吓佢，究竟喺歐洲玩得開唔開心？
另一個自己人就係馬時亨，所以佢都有幸喺台上，同誠哥排排企，同出席嘉賓祝酒，真係威水。
不過，最令人失望嘅係，近日桃色家事外揚嘅新聞人物、經常去國慶酒會嘅全國人大常委曾憲梓，噚日缺席呢個活動，唔知係咪為咗避鋒頭，抑或老人家真係唔得閒？總之就唔見人影，令一眾如八方般懷有無限好奇心嘅人好失望。