構思咗幾個月，有超過二百名成員嘅「專業及資深行政人員協會」噚日創會，佢哋話，成立個會嘅主要目的係推動中港交流，研究政府政策，向策發會提供意見。創會會長容永祺喺記者會上承認，雖然會內有多人身兼選委會成員，不過，佢哋唔係政治組織，同選委會及特首選舉無關喎。至於容永祺本人，保險界冇人唔識，佢就係AIA嘅資深區域總監。
講真呢個協會幾神秘，親政府同親中味道甚濃，八方發現榮譽贊助人原來係煲呔同中聯辦主任高祀仁，副主任李剛就係名譽贊助人，咁真係司馬昭之心嘞。
呢個協會肯定有特異功能，你話假如政府同中方想講嘢，製造輿論嘅話，又多個平台啦。唔怪得嘉賓之中，林瑞麟局長都唱和歡迎專業人士成立團體，向政府提供更多意見。