咪搞錯，呢位一身宮廷服Look嘅Kelly，唔係參加緊甚麼Cosplay大賽或舞會，佢開緊工，佢係「姬子皇朝」嘅女侍應。呢套宮廷服係老闆為配合餐廳歐陸式嘅裝潢而設，Kelly第一次見到都嚇一跳：「嘩，乜着套咁嘅衫開工嘅，會唔會好誇張呀？」不過佢好快就適應：「套衫係連身裙，一笠就得，好方便，唔似普通食肆啲制服咁，又恤衫又西褲又要扣鈕楔衫咁麻煩，絕對唔會影響工作。」睇番套衫，傘裙同袖口位都有喱士，頂帽有蝴蝶結，整體感覺唔浮誇，裙用灰色做主色，感覺典雅令侍應表現到成熟大方嘅一面，咁客人反應又點？「個個客人都讚好靚呀，又話唔似返工衫，仲問我喺邊度買㖭，搞到我家開工都零舍開心。」唔止你開心呀，睇住一個二個靚女侍應着到隻雀咁走嚟走去，呢餐飯，我都食得好開心呀。
記者：蘇振鵬
攝影：黃子偉
1.加多條珍珠頸鏈點綴，感覺更華麗。
2.下散式傘裙有幾層喱士花邊，顯出層次感。收腰裙身突顯女性線條美，係Lolita裝扮特色之一。
3.頂帽用絲帶圍邊，扣上蝴蝶結，簡單得嚟又配合到整個打扮。
阿拉斯加凍蟹$700
阿拉斯加巨蟹Size比兩個拳頭仲要大，急凍運港唔落任何調味料烹調，齋食其原味，點橄欖油或黑醋更能帶出鮮味。
帶子養身豆腐$98
呢塊唔係百潔布，係用豆漿、雞蛋打成嘅豆腐，上鋪菠菜茸。豆腐先蒸後炸，加帶子埋上湯芡，外脆內軟。
舞茸菇炒蝦$160
舞茸菇來自日本，香港較少地方食得到。同一般菇菌相比，舞茸菇較爽口，菇味較濃，配蝦球一齊炒味道最夾。
姬子皇朝LaDynastie（29899338）
地址：數碼港道100號數碼港商場102號舖