咦？點解酒吧入面有學生妹嘅？錯喇，其實喺「Andante」見到嘅學生妹，統統都係侍應生。你千祈咪諗邪嘢喎，呢間酒吧絕對正經高檔，只不過飲食總監Heinz不甘平淡啫：「大部份酒店入面嘅酒吧，啲侍應都係着傳統黑色制服，感覺同年輕女侍應格格不入，完全表達唔到女仔嘅朝氣活力，所以我決定親自設計過另一套制服。」白色上衣襯粉紅格仔百褶裙，的確朝氣勃勃，女仔着上身彷彿回到中學時代，不過Heinz一再強調呢套唔係校服：「校服多數係藍、灰呢類較沉嘅顏色，邊有粉紅色咁Fresh咁Young呀。」
女侍應Coco話：「初初着都唔太習慣，不過客人經常讚我哋套制服又靚又特別，我都幾開心㗎。我以前都係做侍應，從來跟客人嘅對話只限於落單埋單，𠵱家套制服有新意，同客人多咗個話題囉。」靚就靚嘞，咁做嘢方唔方便先？「呢套制服舒服好多，無一般制服咁侷促，以前一定要着高踭鞋，𠵱家可以着對平底鞋，感覺Casual又唔會着到腳痛，行路都行得快過人呀。」見Coco着起制服咁Young，突然間有啲後悔扔咗中學條校服裙㖭。
記者：黃若茵
攝影：陳偉強
1.CappuccinoSmoothies$42
一般Smoothies通常都係生果味，Cappuccino就有新意啲，咖啡較甜，每啖都有冰碎，透心涼呀。
2.炸魚薯條$112
龍脷柳魚肉夠厚，炸完好香脆。薯條都唔可以錯過，薯肉連薯皮一齊炸，入口多一重煙韌口感。
3.北京填鴨Pizza$86
Pizza餅底脆薄，每件都有鴨肉，食得到爽脆京葱，葱香濃烈。除芝士外，Pizza仲加咗填鴨醬，甜甜哋令人食唔停口。
Andante（36028828）
地址：東涌文東路51號諾富特東薈城酒店大堂