收到幾位讀者談及全球暖化、全球冷化嘅題目，想知道最新情況。請大家上Google、打globalwarming或globalcooling，就會有好多資料湧現出嚟。上星期五（九月十五日）金融時報第九版有長文講全球暖化與戈爾（AlGore），大家可以參考。講起戈爾，呢位前副總統最近來港，為佢套紀錄片"AnInconvenientTruth"造勢，《蘋果》有訪問佢，只見佢張照片老咗好多，人又肥咗，與六年前競選總統失敗之時，形象差好遠。
校長S女士在某一場合碰到左丁山，講起佢間學校之通識通材教育就眉飛色舞，當今通識教育，少不了環保、綠色運動、全球暖化呢一瓣，S校長間學校當然更係先鋒。聽佢講，戈爾訪港，接待單位透過教統局安排，邀請若干學校派老師帶領學生數人與戈爾對話講全球暖化。S校長派一位老師與幾位學生去。啲學生去完返到學校，冇乜表情，S校長問領隊老師：「係唔係浪費咗寶貴時間？」老師報告：「校長估得啱，戈爾先生閒話幾句，答幾條普通問題，學生學唔到嘢！」
左丁山生性八卦，聽完S校長咁講，四圍打聽吓。聽到消息人士話戈爾中年發福，與六年前判若兩人，兼且出場時明顯狀態不足，對啲學生可以講得係敷衍了事，故此啲學生感到好失望。
唉，大人物往往鍾意做吓公關騷，以示親民或接近年青人，但係做騷唔係易事，如果冇咗競選動機或者形象嘅話，做騷變成暴露真面目，嚇怕人。
戈爾大概唔會競選二○○八年美國民主黨總統候選人，所以冇政治化粧師跟住，同佢「包裝」過先至見人。比較之下，過氣肥彭仍然魅力十足，戈爾遠遠不及。戈爾唔玩，希拉莉會唔會成為下任美國總統，美國人投佢一票，送兩個總統入白宮呢？美國朋友鬼佬R話唔會：「好多美國人憎佢兩公婆。」不過如果共和黨冇一位似樣嘅候選人，希拉莉創造歷史成為美國第一位女總統，一啲都唔奇！