昨日港股炒高149點，滙控（005）雖只升兩個價位，但最高上過140.80元，對穩定軍心好有幫助，恒指打破悶局，滙控功勞不小。今日個市會唔會繼續炒上，要睇昨晚美股點走，當然日股都唔可以唔理，因為𠵱家港股好淡兩面鬥得好勁，但係又冇足夠把握砌低對方，只靠外圍市況變化搵位搏，個市一日未突破17000同埋17500波動區，都係炒上落。
通常個市炒上，啲炒家都會吼住啲熱門股炒短線，個市係波動格局，正股升跌幅度有限，自自然然就會揀輪炒，啲炒家炒開嘅大隻國企輪梗係最受歡迎，亦郁得最快。
國壽C輪2464：隻國壽（2628）6月中完成調整後，股價又拾級而上，由10蚊上番嚟，唔經唔覺已升到15蚊邊，昨收14.78元，國壽嘅升勢勝在不急不躁，啲捧場客無論揸正股或C輪都好有信心，短線會推去16.50元，中線睇18元。
隻國壽C輪2464掛牌只有11日，但已經吸引唔少炒家，昨日成交額1億元，一啲都唔簡單，報收92仙，升16.4%，槓桿率16.1倍（有效6.9倍），引伸波幅33.4%，對沖值0.43，隻正股升上16.50元，2464應該唔會低過1.80元，就算升到16元，隻輪都應該有6成以上升幅。現價買有唔錯值博率，正股跌穿14.20元止蝕。
另一隻仲有59日到期嘅國壽C輪3889都可以諗，昨收2.45元，槓桿率6倍，正股見16.50元，3889目標價4元，止蝕參考同2464一樣。
俊樺