一蚊雞，可以代表「一元」，亦都可以象徵香港歷史一個里程碑。各位網友可能記得，大約10年前開始喺食肆聽到「一蚊雞」呢味菜，就係一蚊一隻雞，當時可謂「全城哄動」。其實都係食肆嘅宣傳噱頭，搞到間間酒樓都加入割喉減價，推出乜嘢一蚊鴨、一蚊牛咁；咁啱得咁蹺，香港後來經濟開始衰退，有套電影《搶錢家族》仲用嚟做題材，搞笑講啲負資產去到酒樓淨係食一蚊雞，真係笑中有淚……
附送一蚊雞匙扣
點解我突然咁感慨？原因係96年首創「一蚊雞」推廣策略嘅稻香集團，為慶祝「一蚊雞」10周年紀念，𠵱家起至9月30號每晚6至9點，喺稻香海鮮火鍋酒家、稻香超級漁港、迎囍（大埔店除外），同稻香四個品牌食肆，就可以食到「一蚊雞」，或者五毫半隻。（五毫雞？）仲要有一蚊雞匙扣送。:)
今時今日，香港經濟好番啲，負資產大減，食呢隻雞嘅時候，不禁一邊懷舊，一邊抹一把汗呀。 ＞０＜
逢周一至周四刊出