明晚意甲羅馬對國米，後者在新球季的表現令小弟失望而回。佢哋不但冇冠軍相，簡直係侮辱同浪費球迷時間，所以我全力撐羅馬！
國米缺中場指揮官
羅馬的確唔係一日建成！呢句說話正好用嚟形容國米。一隊足球隊同國家嘅強大，其實同樣需要超強嘅領導、人民、團結，花上數以十年、百年嘅艱苦經營，當然仲有少少天意，成功絕非僥倖！巴塞、皇馬、曼聯絕對係好例子。
本來以為國米可以同以上球隊齊名，不過睇完上場對森多利亞，我信心盡失！就算對手扣分，我都覺得佢哋氣數已盡；明晚對住羅馬，必死無疑！國米其實同皇馬一樣，前鋒有級數只欠狀態，但更重要係球隊缺乏中場指揮官，韋拉、甘比亞素、費高都唔係呢類型。如果國米再搵唔到中場核心負責分波同控制比賽，就算有好前鋒都冇用，想攞意大利聯賽冠軍，都係等AC、羅馬降班後再諗！
英聯賽盃難爆冷
今晚英格蘭聯賽盃，最好向英超球隊埋手，樸茨茅夫同雷丁係最佳選擇，特別係前者，估唔到有蘇甘保同格連莊臣嘅後防，竟然可以守到滴水不漏零失球，防守仲穩陣過多支英超勁旅！所以大家不妨追吓樸茨茅夫，直到佢輸波為止！
商業1台《球迷集中贏》主持周鵬
電郵：[email protected]