搵partner幾時都要搵個同聲同氣啱嘴形嘅，但華華認為咁都唔止，最緊要係步伐一致，否則好似二少檔8號仔同埋佢旗下「並唔係包伏」嘅SUNDAY咁，一個唔覺意，俾人戙到應，出醜就唔抵！
話說黃頁同和記3仔同埋SUNDAY，一齊搞流動黃頁，但二少爹哋嗰檔3仔，上星期五已經公布咗，而SUNDAY噚日先公布，足足遲咗三日，最弔詭係，SUNDAY同黃頁話晒都係同根生嘅姐妹公司，理應快過3仔，究竟發生咗咩嘢事呢？
SUNDAY俾人笑
聽聞黃頁話事人約好晒大家噚日一齊發稿，不幸地3仔偷步，佢哋知道後亦冇乎，最後咪搞到SUNDAY俾人（尤其係marketing廣告界）笑囉！唔好睇小呢件事，因為某程度反映黃頁同埋SUNDAY班marketing高層嘅辦事能力係幾高！但係如果要講到邊個為呢件「小事」負責，惟有話超人終於搵到位跣番二少一鋪！
講到呢度，不妨同大家分享電訊界最近有乜八卦嘢。話說有間電訊公司，近排阿媽可能轉莊，但電訊公司嗰班紅綠眼管理層，無收到風老細會帶埋佢哋走，於是大家積極做嘢，同肯定要留低三年又三年嘅「富車阿民」拗手瓜爭嘢，務求日後響阿爺腳下仲有啖安樂茶飯。
子公司呢？搞「三豬」個檔「安息日」，前朝老細BB仔上兩個月已走人，但就留低咗個心腹秘書姐姐，畀新話事人石頭佬，而石頭佬亦好順攤接收咗呢位姐姐，不過石頭佬乜都親力親為，自己做晒，佢係一個好老闆嗎？鎖你，盲都睇到係等秘書姐姐頂唔順自己走，你話呢間公司係咪好得意呢？
李華華
[email protected]