孫柏文噚日應承過大家，今日會跟進原材料近期走勢同展望，不過因為全世界都係等緊花旗國聯儲局周中會展開有關利息嘅會議，希望大家可以原諒我，今日向一位偶像級前輩講一句「多謝」。
孫柏文仲係好細嘅時候，好鍾意睇漫畫書。其中我最鍾意嘅漫畫，就一定係日本鳥山明先生嘅《龍珠》。當中主角「孫悟空」武功高強，身懷百般武藝，招式層出不窮，例如有好出名嘅「龜波氣功」。除咗武功高強之外，「孫悟空」仲可以喺危急關頭，將自己變成威力特強嘅「超級撒亞人」。表面上睇「孫悟空」同敵人戰鬥，一定覺得佢最能擊退敵人嘅招數，一定包括一些快而強勁嘅動作。
孫悟空有絕招
不過，真正嘅《龍珠》fan屎，就會知「孫悟空」使出最厲害嘅招式時，單憑望住佢，根本唔會知佢出緊招。因為，「孫悟空」最厲害嗰招叫做「元氣彈」，「元氣彈」就係需要「孫悟空」企定定，舉高雙手，將手掌向天，凝聚全宇宙生命元氣嘅力量，變成一個「彈」，向敵人轟炸。話到明係「企定定」，就當然代表「實非一般光看表面之士能洞明者」。
噚日，孫柏文就好似平時一樣，好用心機咁睇王冠一前輩寫作嘅專欄《國際視野》。每一次睇冠一兄嘅專欄，小弟都會獲益良多，噚日亦不例外。
喺噚日嘅《國際視野》裏面，冠一兄就提醒我哋呢啲後輩，點解佢老人家係我哋特區首屈一指嘅財經評論員。冠一兄話：「環顧左右，冠一敢說俺是第一個提出保哥仔（投資銀行「高盛」前主席，新任花旗國財長，保爾森HenryPaulson）非等閒之輩之餘，其捨高薪厚職、毅然從政所要背負之國家重任，實非一般光看表面之士能洞明者。」
其實，孫柏文就係其中一個冠一兄所講嘅「一般光看表面之士」，因為保爾森上台嘅時候，我曾經好懷疑，佢能否擺脫花旗國牛仔總統一向以來將花旗國財長淪為硬銷政策嘅推銷員角色。冇辦法，保爾森之前嘅花旗國財長，都係「非等閒之輩，捨高薪厚職、毅然從政」去背負服務國家嘅重任嘅人。
花旗國救樓市
不過，唔知冠一兄係唔係知道，有好多我呢啲「一般光看表面之士」睇《國際視野》。就有如嗰啲「一般光看表面」嘅《龍珠》讀者一樣，我哋呢啲人根本唔會明「元氣彈」級嘅政策，所以冠一兄噚日講來講去，都係講保爾森啲花拳繡腿、無關痛癢嘅「招式」。
例如，話保爾森幫越南呢啲三流小國入「自由市場支持者」非常崇拜嘅世貿WTO，去用一啲就連我呢隻「牛」都會懂得欣賞嘅「琴曲」，去歌頌保爾森。又或者話保爾森就憑講一句：「強美元符合美國利益。」所有原材料價格紛紛急跌，盡顯保爾森能借「各大中央銀行吹來東風」嘅能力。
其實，我知道冠一兄係特登唔講，一項啱啱推行，真正關花旗國財長事嘅「元氣彈」級政策，費事嚇親我呢啲「細路仔」。呢項政策就係花旗國財政部，再次容許FannieMae和FreddieMac放水谷高樓市，將一年前禁止呢兩個樓市泡沫炸彈繼續膨脹嘅政策180度扭轉，借助呢個花旗國數以億計樓民繼續消費嘅「元氣」，去挽救經濟。
最後，我唔敢同意王冠一前輩話《信報》係「全城最專業財經報章評論」，因為我覺得我哋《蘋果日報》先係最強，因為我哋有王冠一兄嘅「國際視野」！
孫柏文