今個禮拜日煲呔又出遊，今回「泛」去毛伯伯嘅家鄉湖南長沙。咁遠道而去，當然唔單係睇吓天心古閣、馬王堆漢墓古迹，亦唔止係為咗去愛晚亭欣賞秋景，而係為咗「促進港商與泛珠三角區域的經貿合作」。記得早前煲呔已經為咗「九加二」區域合作率團去過昆明，遲吓佢仲會去埋貴州同江西。
六百人殺上長沙
呢個訪湘團，係由工商及科技局同貿易發展局一齊搞，咁平叔做得局長，一定要隨團北上。曾俊華主任、蔡瑩璧常秘、新近唔使扶貧嘅謝凌潔貞亦一齊陪煲呔北上，至於啲老細同埋大企業代表，估計有成六百人咁多，長沙間華天酒店都唔知夠唔夠住。講開呢間華天，都好有名，宋楚瑜去長沙就喺度落腳。
一定食到臭豆腐
煲呔會喺長沙留三日，除咗參加「湖南香港經貿合作交流會」之外，下周二亦會去湖南大搞嘅「中部貿易投資博覽會」開幕禮，順便見見中部六省嘅領導，打個招呼，中央若然問到就講兩句好說話。至於佢話過好想睇嘅天心古閣馬王堆愛晚亭之類文化景點，要睇時間點安排；不過湖南人咁好客，特區領導咁遠嚟到，冇話唔安排你去玩吓食吓。記得八方早前寫過，長沙名店「火宮殿」已經做好準備，若果煲呔大駕光臨，一定有臭豆腐食（火宮殿臭豆腐聞名湖南，58年毛主席返鄉下，都特登搵嚟食），保證唔會發生黃亞細事件。
煲呔前後會在湖南留三日，其間由肥龍許仕仁做署理特首。現時官員放假或者外訪，只要唔使上立法會解畫，一般唔搵人署理。但特首咁巴閉唔可以懸空，搵肥龍做啱晒。
講開煲呔，大家咪以為佢淨係識北上拜土地，其實佢都好關心特區人民。好似啲大學生唔識世界，佢不恥下講，教精佢哋。遲吓煲呔就會去中大逸夫書院講一堂通識教育，課題係「務實領導」。
咁啱噚日葉劉淑儀個老師又去咗中大開壇，有個百厭學生竟然窒葉劉篇論文；你估煲呔去做人之患時，學生仔會唔會整番場四院互片招呼佢呢？