如果你仲未意識到唔扣安全帶有幾咁危險，咁不如睇睇以下呢段片，短片一開始係講一對熱戀中嘅年輕人跳上朋友仔架車度齊齊坐喺後面，個男仔懶瀟灑咁唔扣安全帶，仲郁來郁去同前面兩個朋友傾偈，點知對面線架車鏟埋嚟，男仔先衝撞向前面兩個朋友，繼而又向後彈撞落女朋友度，就係咁個男仔好似彈珠機粒鋼珠咁彈嚟彈去，結果，個男仔死唔去，但全車朋友就俾佢撞到死晒。
雖然呢段只係一個保險公司嘅廣告短片，但唔好以為無咁誇，Post呢段片上網嘅仁兄，話東京大學曾經做過研究，如果後座乘客扣好安全帶做足安全措施，係可以減低前座乘客八成嘅死亡率。因為當汽車撞擊時，無扣好安全帶嘅後座乘客就會好似短片裏面個哥哥仔咁，撞完前再撞後，大命嘅話自己就重傷死唔去，但可憐嘅前座乘客同隔籬位嘅人，就係咁俾佢撞散晒，呢啲真係累人累己累街坊。
記者：黃婉冰
http://hexamax.com/blog/2006/08/04/belt/