意甲周中加開快車，我都揀番場巴勒莫主場對卡坦尼亞捧吓場。巴勒莫繼上周在足協盃作客以1:0小勝韋斯咸後，周末在聯賽作客亦以2:1擊敗拉素，開季連贏3場，氣勢甚盛。
今場作客嘅卡坦尼亞近況都唔錯，開「咧」戰作客1球小勝卡利亞里，上仗主場又同阿特蘭大打和，以一支升班馬嚟講，都算有所交代。今次對住巴勒莫，可以話遇上真正考驗！兩隊近況都唔錯，不過，要揀梗以主隊秤先，加上升班馬以護級為主要目標，唔可能場場同你拼盡。今場作客聯賽榜二哥，搶分難度高，倒不如留力下仗主場對住墨西拿仲容易攞分！所以今場一於揀主客和：主勝。
利記往績贏晒W得
另一心水之選係利物浦主場對紐卡素。利記近況認真麻麻，4戰僅1勝，上周作客車路士在人多打人少下都要輸波，好明顯季初仍未上力。不過往績上，利記近14次主場對住紐卡素就明顯佔優，錄得11勝2和1負，勝出率差不多有8成。利記家陣於聯賽榜位列中下游，為免被車仔、曼聯拋離，今場必然要搏。
紐卡素上仗雖然作客贏波，但佢哋作客始終唔穩定，上季仲輸咗11場，咁嘅作客成績，試問點揀得落手？倒不如相信利記有主場之利，揀主客和主勝仲實際。
有線球彩台主持阿鵬
電郵：[email protected]