1月份新鮮上市嘅恒寶利，上星期派成績表都唔開記招，佢哋個主席岳欣禹到噚日先得閒見人，乜解究唔開記招？岳主席話，要飛來飛去好忙囉！之不過，噚日佢由早上10點踩到下晝3點半，夾埋先見得五個記者，不如開記招好過啦！
其實恒寶利呢間公司有乜好講？華華認為，最吸引係阿岳氏伉儷嗰段中港奇緣囉！話說岳生原本係江蘇服裝進出口公司銷售部主管，因為工作關係，識咗大佢九年、當時係香港貿易公司總經理的岳太，拍拖三個月就結婚，之後岳太放棄香港份工，95年兩公婆用百萬本錢，創立成衣貿易公司J&B，2000年改埋名恒寶利，今年仲上埋市，邊個話香港女人唔娶得過呀？
睇番條數，上半年賺3500萬，股價升咗四成幾，咪話唔犀利。岳主席話，打算今年喺中港開設Sisley、Stonefly同lotto銷售點至150間，力求喺08年分銷及零售業務達到營業額至少30%。